frEsch wëll Richtung22 aus dem Bâtiment4 geheien

Mir si richteg rosen. frEsch, eng ASBL déi vun der Escher Gemeng benotzt gëtt fir Kultur-Ausgaben ze verschleieren, wëll eis aus eise Raim am Bâtiment4 geheien. Si wëllen eis aus Esch raus hunn.

Firwat? Mir kruute keng Grënn genannt, kruute keng Virwarnung a kréien elo och zanter iwwer 2 Wochen keng Äntwert. Nodeems lescht Joer schonn de Projet F.U.T.U.R.E vu CELL, a Bunker, souwéi noc.turn rausgeschmass goufen, soll et elo eis treffen, offensichtlech well mir de Mond opgemaach hunn an d’Mëssstänn ugeschwat hunn amplaz, wéi am Kultursecteur üblech, brav Merci ze soen a soss de Bak ze halen.

Et geet net just ëm eis, hei geet et drëms, wat fir eng Kulturpolitik an dësem Land gemaach gëtt a wien oder wat hei am Land eng Zukunft huet oder net. frEsch huet e Budget vun iwwer 7 Mio. € (!), gëtt awer zanter dësem Joer keen Cent méi fir dei lokal Kreatioun oder fir de Bâtiment4 aus.

frEsch selwer ass geprägt vun Intrigen, Interessenskonflikter an verstoppten Finanzskandaler. Et geet bei frEsch net ëm Konschtfërderung mee ëm Prestige-Events mat méiglechst groussen VIP-Terrassen.

D’Lag ass fir R22 ganz geféierlech. An eise Räim am Bâtiment4 steet d’Bünebild vum Theaterstéck “Ween stoppt RTL?” fir eng Reprise am Hierscht. Mir hu keng aner Plaz. Alles wat mir eis an deene leschten 3 Joer zu Esch opgebaut hunn ass a Gefor. Zanter de Bréif uganks Abrëll ukomm ass, versiche mir Leit z’erreechen an Informatiounen ze kréien, mir hunn eis elo och un de Gemengerot adresséiert.

Haut wëlle mir virun allem eppes kloerstellen. Wa sech Leit bei frEsch der Illusioun higinn hunn, eis mat engem Bréif aus eisen Atelieren raus ze kréien: Dir hudd iech getäuscht. Mir hunn net vir, de Bâtiment 4 sou ze verloossen. Mir si richteg rosen, genervt, enttäuscht an traureg – mee mir si virun allem prett ze kämpfen a wëssen, dass mir net alleng sinn.


*** Update 17.05.2024 ***

An der Gemengerotssetzung vum 17.05. (Ab 1:06:00) gouf iwwer d’Conventioun vu frEsch an de Rausworf vu Richtung22 aus dem Bâtiment 4 diskutéiert.

Zanter 6 Wochen si mir am Ausnamezoustand a vernoléissegen eis eigentlech Aarbecht. 6 Wochen an deene mer versiche mam Verwaltungsrot vu frEsch an d’Gespréich ze kommen. 6 Wochen, no deene mir nach ëmmer offiziell kee Grond fir eise Rausworf aus dem Bâtiment 4 genannt kruten an awer déi lächerlechste Gerüchter a Ligen hannert de Kulissen an am Verwaltungsrot vu frEsch verbeed goufen.

Well Demokratie awer eben net just d’Ego-Show vun engem eenzege gewielte Politiker ass, well de Konschtsecteur solidaresch, d’Press opmierksam an d’Oppositioun waakreg ginn ass, krute mir elo den absolutte Minimum versprach. Richtung22 däerf nach bis zum Enn vum Joer am Bâtiment 4 bleiwen. Mir kréien eng Verlängerung fir déi aktuell Projeten ofschléissen ze kënnen an Zäit ze hunn, eng Alternativ ze fannen.

Et gëtt elo theoretesch d’Chance sech wierklech un en Dësch ze setzen. De Verwaltungsrot vu frEsch muss sech spéitstens elo froen: Wourëms geet et hinnen iwwerhaapt? Wiem bréngt et eppes Richtung22 aus Esch erauszegeheien? Wat ass da mat der Nohaltegkeet vun Esch2022, wat mat der Zukunft vum “Tiers lieux culturel” Bâtiment 4 a wat mam Verspriechen, dass Esch eng “Terre d’accueil pour creatives” soll ginn? Op déi Chance fir en Neistart genotzt gi wäert bleift onkloer. Kloer ass, dass mir bereet si weider fir eng richteg Perspektiv ze kämpfen.


Iwwersiicht Austausch an Dokumenter

a) Kommunikatioun tëscht frEsch A.s.b.l. a Richtung22 zanter dem 18. November 2023
– 04.04.2024: Recommandé vu frEsch u Richtung22: R22 soll Bâtiment4 bis den 31.05. verloossen
– 05.04.2024: Äntwert vu Richtung22 u frEsch: Fro no Grënn an Austausch
– 13.04.2024: Richtung22 relancéiert Demande no Explikatiounen u frEsch
– 21.04.2024: Richtung22 schreift dem Gemengerot vun Esch
—> Dossier fir de Gemengerot: Den Historique vun den Aktivitéiten vu R22 am Bâtiment4
—> Dossier fir de Gemengerot: D’Zukunft vu Richtung22 zu Esch
—> Dossier fir de Gemengerot: Den CV vu Richtung22, Iwwersiicht Projeten
– 23.04.2024: Richtung22 publizéiert Statement
– 24.04.2024: frEsch widderhëlt Opfuerderung u R22 de Bâtiment4 zum 31.05. ze verloossen
– 24.04.2024: Richtung22 schreift frEsch a Reaktioun op Bréif, freet nees Grënn an Austausch
– 25.04.2024: Pressecommuniqué vu frEsch zum Statement vu Richtung22
– 27.04.2024: Reaktioun vu Richtung22 zu de Virwërf vu frEsch


Pressespiggel

“frEsch macht Ernst: Richtung22 kämpft gegen Rauswurf” (Tageblatt, 25.04.2024)
“Kulturzentrum „Bâtiment 4“: Richtung22 fliegt raus” (WOXX, 25.04.2024)
“De Sträit tëscht frEsch ASBL a Richtung 22 geet weider” (100komma7, 25.04.2024)
“frEsch bezieht Stellung: Warum Richtung22 gehen muss” (Tageblatt, 25.04.2024)
“Richtung22 gegen frEsch: Dritte Kampfrunde oder Versöhnung?” (Tageblatt, 01.05.2024)
“Kulturpolitik in Esch: frEsch unter Beschuss” (WOXX, 02.05.2024)
“Die Zukunft von Richtung22 steht auf dem Spiel” (Luxemburger Wort, 05.05.2024)
“Junge Künstlerkollektive brauchen stärkere Unterstützung” (Luxemburger Wort, 05.05.2024)
“Richtung22: eraus aus dem Bâtiment 4?” (100komma7, 06.05.2024)

“Richtung22 darf vorerst bleiben” (Luxemburger Wort, 17.05.2024)
“Escher Gemeinderat – Richtung22: Galgenfrist gewährt, doch Entscheidung steht” (Tageblatt, 17.05.2024)
“Stad Esch: Richtung22 soll bis Enn dës Joers am Bâtiment 4 dierfe bleiwen” (100komma7, 17.05.2024)