2010 ass de Kollektiv Richtung22 (R22) entstanen, als onofhängeg Initiative vu eelere Memberen vum TNL-Jugendclub, Leit aus dem Stader Conservatoire a weidere jonke Film- an Theaterbegeeschterten.
2012 huet sech de Kollektiv als A.s.b.l. ugemellt an wiisst zanterdeems ëmmer weider op aktuell iwwer 40 aktiv Memberen.

R22 besteet aus Schüler*innen ab 18 Joer, jonke Beruffsufänger*innen an haaptsächlech aus Studéirenden. Dat sinn net just Film- oder Theaterstudent*innen, mä och Leit aus Politikwëssenschaften, Medien, Philosophie souwéi Ekonomie, Sproochen asw.


Logo R22

Et geet och aanescht

Als Netzwierk erfëllt R22 eng zentral Roll ënner jonke Kënschtler*inne zu Lëtzebuerg. De Grupp experimetéiert gären a setzt an véier wesentlechen Beräicher op Innovatioun:
– D’Aarbechtsweis ass onhierarchesch.
Kënschtler*innen sinn hei net Eenzelkämpfer*innen mee Deel vun engem Ensembel. Mir féieren Jonker zesummen, kréeieren onoofhängeg Réim an deenen autonom geschafft ka ginn an stäerken eis géigesäiteg. Richtung22 versteet sech awer och als Konschtlobby, déi do d’Wuert ergräift wou d’Interessen vun der Konscht a jonke Konschtschafenden um Spill stinn.
– D’Produktiounsmëttel ginn reduzéiert, de Fokus läit ganz um Inhalt. D’Distributioun konzentréiert sech op déi nei Medien an et gëtt mat neien Konschtformen experimentéiert.
– Mir schaffen u gesellschaftlech a politesch relevanten Themen. Zil ass et, op ëffentlech Debatten anzewierken an dës ëm en alternativen Bléckwénkel z’erweideren. Mir zécken net, fir eis kloer ze positionéieren an mat Hëllef vu kënschtleresche Mëttel ze polariséieren, fir eis Standpunkter siichtbar ze maan.
– Et gëtt en neien, jonke Public erreecht. Generell schaffe mir u Konzepter fir Konschtproduktiounen aus den elitären Nischen ze huelen a Konscht an den Déngscht vun de Leit ze stellen.


Finanzéierung

Fir Richtung22 muss Konscht fir all Mënsch fräi zougänglech sinn. Eis Produktiounen sinn ëmmer gratis an wa méiglech och online ze fannen.

Bei eisem Budget si mir zanter ee puer Joeren gréisstendeels onofhängeg. Fir de Filmprojet froen mir eng minimal Ennerstëtzung (2.000€) beim SNJ un, eist Theaterstéck an eis Radiossendung produzéiere mir ouni finanziell Ennerstëtzung vu baussen. Finanzéierung duerch Sponsoring kënnt fir eis net a Fro.

Mir wëllen domat allerdéngs net den Androck entstoen ze loossen, dat Konscht näischt kaschte géif – am Géigendeel. Mir setzen eis fir d’Regulariséierung vun de Beruffer vun de Konschtschafenden a fir fair Aarbechtsbedingungen an. Prioritéit bei der (ëffentlecher) Konschtfinanzéierung sollt eiser Meenung no d’Schafen vun akzeptabelen Aarbechtsbedingungen fir d’Konschtschafender sinn. (–> Weiderliesen: Eis Campagne zur Kulturpolitik)

Richtung22 sicht aktiv no Weeer fir eise Memberen (och als Grupp) eng Zukunft am Konschtsecteur ze ginn – awer eben net zu all Präiss.


Dir kënnt d’Aarbecht vu Richtung22 mat engem Don ënnerstëtzen. Spenden ginn an d’Filmproduktioun (zB. an weidert technescht Equipement) an an kënschtleresch Aktiounen gestach.

Konto vun Richtung22 A.s.b.l. bei der BCEE:
LU64 0019 4055 9966 3000