Lëtzebuerg kritt e Maskottchen

Heimat melle mir eis (+/- 4 Persounen vun eis, selbstverständlech “a titre personell”, sou wéi déi aner Organisatiounen et och maachen, wann se hier Leit getarnt dohinner schécken wëllen) fir de “Creathon” de 4.-5. Mäerz un. Mir wëllen onbedéngt mathëllefen Lëtzebuerg dat visuellt Konzept ze ginn, dat dëst Ländchen a seng Bankeplaz verdéngen.
Mir bidden Iech geballt Kompetenz, an zwar aus alle Beräicher, déi der an ärer immens diverser Lëscht hutt – ausser “chef d’entreprises” an “citoyens intéressés”. Dir kënnt eis also en detailéierte Profil-Wonsch eraschécken.
– Artisten: Hu mer dobäi, kann een net wierklech gebrauchen, mä dat mécht sech ëmmer gutt, a verharmlost den eigentlechen But hannert der Saach.
– Graphisten: Hu mer och, mir hu souguer Leit am Grupp, dei InDesign KAF hunn)
– Designeren: Dat sinn déi, déi Kënschtler*inne gi wollten an awer eppes verdénge wollten, gell? Ass dat net eng Iwwerkategorie vu “Graphiker”?
– Cinéasten: Mir lueden gären a vill Filmer rof, natierlech nëmme legal!
– Historiker: Mir hunn der vun däer Zort, déi tatsächlech och der Meenung sinn, dass et lëtzebuerger Kollaborateure goufen – well Der däer, oder sidd der aus PR-Grënn éischter un engem à la Barthel interesséiert?
– Soziologen: Hu mer der direkt e puer, mee woufir braucht er déi? Stellt Iech fir déi kommen a stellen alles a Fro.
– Informatiker: Hu mer der zwee, mee déi nerven mega, schwätzen net vill an ernähre sech schlecht. Wëllt Der sou Leit wierklech do hunn?
– Chefs d’entreprise: FAIL —> Mä sou eng Bréifboîte ass séier opgemaach, hei am Land gëtt et sécher vill Hëllef, wa mer sou eng Entreprise grënne wéilten.
– Journalisten: Dir wëllt d’Press abannen, fir datt se involvéiert ass an herno net kritesch driwwer beriicht? Clever, mir hunn däer bëlleg Freelance-Journalist*inne fir iech!
– Communicateuren: Dat si mer op alle Fall, kuckt, wéi professionell mer hei mat Iech kommunizéieren a wéi mer Är Äntwert herno un d’Press weiderkommunizéiere wäerten.
– Consultants: Dat ass déi eigentlech Zilgrupp, gell? Brénge mer mat, ass jo een zimlech dehnbare Begrëff.
– Jonk Talenter: Hu mer net, mä mer probéieren der bis dohin ze fannen, noutfalls melle mer eis beim Luc Spada.
– Citoyens intéressés: FAIL —> Mä: mir ëmfroen eis. Géifen alternativ och “Wutbürger*innen” duergoen?
Mir sinn deemno perfekt geeegnet fir alles, wat dir wëlles hutt. Hei dann nach eise kuerze Paragraph fir eis Motivatioun ze beschreiwen.
1) Mir kennen eis WIERKLECH mat deem Thema aus, hunn ALL dem Simon Anholt seng Riede gekuckt, wëssen ween den Wally Ollins ass, wëssen souguer, dass et beim Nation Branding guer net drëm geet ee “Visuell” ze schafen a fannen et dofir em sou méi interessant, dass Dir dat lo probéiert.
2) Mir si grouss Fans vu Propaganda! A mir sinn Fans dovun, d’Leit mat schéine Biller an onwichtegen Niewenhandlungen ofzelenken. Eisen absoluten Liibling ass do de Xavier Bettel, a mir hätte suguer besser Medieberoder zur Säit wéi hien, fir de Leit ze weisen, dass mir an hirem Interêt handelen.
3) Mir hu scho kreativ Proposen gemaach an aktiv um Image vum Land geschafft. Mir inspiréieren eis generell un der PR-Campagne “LuxLeaks” a mengen, dass do nach vill ze maachen ass. Eis Virschléi hunn et e.a. an d’New York Times gepackt an do wor d’Photo vun eisem Member méi grouss dran wéi déi vum Regierungsmember.
4) Mir hu Lëtzebuerg wierklech gär! Also net sou wéi een Persounen gär huet, oder wéi een zum Beispill Saachen gär huet, déi wichteg sin. Mä ebe genee sou wéi Leit, déi soe se hätten “e Land gär”, aus dem Grond, well et “net een anert Land” ass. Voilà.
Mir hoffen, dass dëst Iech iwwerzeege konnt, stinn vir all weider Fro zur Verfügung a freeën eis op eng offiziell Invitatioun.
Richtung22
P.S.: Mir géife WIERKLECH kommen.
P:P:S.: Mir wonneren eis éischter, dass Dir nach net vum selwen drop komm sidd eis z’invitéieren.